أيام!
بقلم: ميرڤت عبدالله
بأعيش يوم و أموت 100
و راضية بيوم بجد أحياه
لكن يومي اللي كان ليا
تايه مني و مش لقياه
أيام و متفقة عليا
تزيد الدمع في عنيا
و حيرة تكون في لياليا
تصحي جراح وجع عيشاه !
و لأمتي حأقول خلاص هانت
يعدي يوم و يوم تاني
و يوم ثالث. !ّ
تعدي أيام كثير بعده
و أنا لسه بأقول برضه
يجوز بكره يجيني الفرح
و أكون بكرة معاه عيشاه
يفوت اليوم
يفوت الشهر
يعدي كثير كمان من العمر
و أنا لسه
بأقول بكرة
و بكرة بعيد و مش شيفاه !
