اسمي نغم ..
بقلم: امل محمد
أسمى نغم ..
اتولدت فى اسره متوسطه ماديا واجتماعيا. اتربيت وسط امى واخواتى الصغيرين ماجد ومازن ومروان مع الوقت بدأت احس ان فى حاجه غلط فى حاجه نقصاني …. هو فين بابا ليه مش موجود ليه مش بيسأل علينا ليه مش بشوفه .. ليه مش بيسمعنى ! انا تقريبا معرفهوش .. بدأت اسأل عليه ماما تقولى مشغول بيتعب عشان خاطركم بابا ف الشغل . جمل دايما بسمعها كل ما بسأل عليه .. بس ماما مالها بتعيط ليه عالطول ..ماما هى اللى بتعملنا كل حاجه دايما معانا وتسمعني فى كل حاجه بس انا حساها مش مبسوطه انا عارفه انها بتحاول تدارى حزنها بس انا حاسه بيها ودايما بسمعها وهى بتعيط … وجه يوم عيد ميلادى وكل اللى حواليا كانوا مبسوطين معادا انا .. انا الوحيده اللى كنت حاسه ان فى حاجه مش بسطانى هو فين بابا …. مجاااش ! واليوم ده قررت استناه وسهرت وجه متأخر . خبط بابا على الباب وجريت افتح وانا فرحانه . سألني عايزه ايه قولتله وحشتنى عايزه اتكلم معاك … مش دلوقتى حبيبتى انا جاى تعبان . بس انا عايزه احكيلك حاجه حبيبتى مش فاضى . بس انا ….. وزقنى ودى كانت أول مره يضربني فيها … قررت مستسلمش كل يوم استنى بابا وحشتنى وبابا كل يوم مش فاضى مش قادر مش عايز وكل يوم بقى يضربني ويهنى .. كبرت وروحت المدرسه وبقيت ادور على بابا فى كل مكان فى كل راجل اقابله مدرس او زميل اى حد بقيت احس ناحيته بمشاعر محتاجه احساس الاب من اى حد … احساس الأمان . وبما انى مش لاقياه بقيت ادور عليه مبقتش عارفه هفضل لامتى مستنيه … وبعدين لقيت نفسى بكتب لنفسى وبحكيلها وفضلت اكتب واكتب … وانا ف الجامعه قابلت شاب اتعرفت عليه واتخطبنا وقضيت معاه فتره خطوبه صعبه إهمال اهانه كانى شوفت نسخه تانيه من بابا والغريبه انى صممت اكمل واتحديت امى . واتجوزنا وبقيت كل يوم استناه يجى اقوله محتاجلك عايزاك وبقيت كل يوم استنى وكانى بستنى بس عشان اضرب واتهان وبعدين جبت بنوته حلوه نور وهى كانت نور حياتى أجمل بنوته فى الدنيا نسيت بيها وعشانها كل حاجه فى الدنيا لغايه ما فى يوم بنتى سألتني ….. على باباها . خفت .. هى بنتى هتعيش نفس حياتى تانى رفضت . وفى يوم قررت اخيرا اتكلم مع امى واصارحها واحكيلها وكان قرار متأخر بس .. الحقيقه امى ساعدتنى وروحت لاخصائى نفسى وتكلمنا وفضلت جمبى وانا جمب بنتى لغايه ما عديت من ازمتى وقررت اتكلم مع جوزى واحاول معاه عشان بنتى . وبقيت احاول اعرف بنتى بتحب ايه اهتمامتها مهارتها وبقيت اطور منها لحد ما وصلت بيها لأنها بقى عندها طموح واحلام بتحققها وحاولت اعرفها ان لازم مشاكلنا تكون دافع قوى لتحقيق احلامنا ومع الوقت جوزى اتغير وشاف بنته بتكبر وبتحقق أحلامها بقى يتكلم مع بنته وبقى يسمعنا .. واخيرا حسيت انى لقيت بابا اللى بدور عليه مع انه متأخر بس لقيت اللى كنت عمرى كله كنت بدور عليه وبنتى لقت باباها واخيرا كل اللى كان بيحصل معايا بنتى مش هتمر بيه . واشتغلت واكتشفت فى نفسى مواهب كتير اهمها الكتابه وفضلت اطور فيها انا اكتشفت ان عندى قوه مكنتش متخيلها لانى كنت تايهه فى مشكلتى انى ادور على بابا والى مكنتش عارفاه ان مشكلتى ممكن تكون هى مصدر قوتى لحد ما بنتى هى اللى فوقتنى وكملت دراستى وحصلت على دكتوراه ونجحت جدا فى شغلى ووقفت على رجلى بمساعدة امى واخواتى وجوزى وبنتى . أما بنتى بقت ناجحه ف حياتها وشغلها وسعيده مع باباها …
ارجوكم خدوا بالكم من أولادكم دايما اتكلموا معاهم اسمعوهم شوفوا مشاكلهم .. ولكل بنت ولكل ولد انت مش لوحدك احكى لمامتك احكى لمدرستك احكى للاخصائى فى المدرسه اطلب المساعده وعبر عن مشاعرك
